Prof.ass.dr. Valon Krasniqi ka diplomuar në Fakultetin e Mjekësisë - Drejtimi i Mjekësisë së Përgjithshme të Universitetit të Prishtinës “Hasan Prishtina” në vitin 2005, ndërsa në vitin 2006 është angazhuar si mësimdhënës në Katedrën e Farmakologjisë me Toksikologji dhe Farmakologji Klinike të Fakultetit të Mjekësisë të UP-së. Në vitin 2013 ka përfunduar specializimin nga Farmakologjia Klinike, ndërsa në vitin 2017 e mbron me sukses Doktoratën nga fusha e Farmakogjenetikës në Fakultetin e Mjekësisë të Universitetit të Zagrebit / Kroaci. Në mars të vitit 2020 është zgjedhur në pozitën Profesor asistent për lëndën e Farmakologjisë. Në po të njëjtin vit (2020) ka përfunduar edhe specializimin e dytë nga Pediatria. Fushat e tij të interesit janë hulumtimet shkencore dhe aktivitetet që lidhen me fushën e Farmakologjisë Klinike dhe Farmaceutikës, me theks të veçantë projektet e lëmisë së Farmakogjenetikës. Një fushë tjetër ku është i kyqur dhe punon qe një kohë të gjatë është edhe Pediatria. Ka marrë pjesë si ligjërues në shumë Shkolla dhe Kongrese Pediatrike. Është autor ose bashkëautor i disa projekteve shkencore të sponzorizuara nga Organizata Botërore e Shëndetësisë (OBSH) dhe Ministria e Arsimit, Shkencës dhe Teknologjisë së Kosovës (MASHT). Nga viti 2020, është pjesëmarrës në projektin ndërkombëtar me qendër në ‘The Rockefeller University Hospital’, New York , SHBA të titulluar “Genetic Predisposition to Acute Severe Viral Infections”. Është anëtar i Komisionit Rishqyrtues të Ministrisë së Shëndetësisë së Kosovës për Udhëzuesit Klinik:  "Menaxhimi dhe trajtimi i COVID-19". Që nga viti 2012, është anëtar i ISPOR (Association for Pharmacoeconomy and Therapy Outcomes) ndërsa nga viti 2017 është anëtar i Komisionit për Vlerësimin e Produkteve dhe Pajisjeve Medicinale (KVPPM) në kuadër të Agjencisë Kosovare për Produkte dhe Pajisje Medicinale (AKPPM).  Lidhur me edukimin specialistik, qe disa vite mentoron një numër specializantësh nga lëmia e Farmacisë Klinike. Është autor dhe koautor i një sërë punimesh me relevancë shkencore. Aktualisht mban pozitën e Prodekanit për mësim dhe çështje të studentëve në Fakultetin e Mjekësisë të UP-së.