Përshkrimi i Programit të Studimeve të Doktoratës – Stomatologji

Programi i studimeve të doktoratës në Stomatologji në Fakultetin e Mjekësisë të Universitetit të Prishtinës është i strukturuar si program trevjeçar, me gjithsej 180 kredi ECTS, në përputhje me Kornizën Kombëtare të Kualifikimeve dhe standardet evropiane për arsimin e lartë dhe kërkimin shkencor. Programi synon përgatitjen e doktorantëve për punë të avancuar akademike, kërkimore dhe profesionale në fushat bashkëkohore të stomatologjisë.

Struktura e programit përfshin lëndë obligative dhe lëndë zgjedhore, të cilat janë të dizajnuara për të ndërtuar bazën teorike, metodologjike dhe etike të kërkimit shkencor, si dhe për të mbështetur zhvillimin e kompetencave të specializuara sipas fushës së interesit të doktorantit. Pesha kryesore e programit i kushtohet punimit të doktoratës, i cili përfaqëson një kontribut origjinal dhe të pavarur shkencor në fushën e stomatologjisë, bazuar në kërkime rigoroze, të riprodhueshme dhe me ndikim akademik.

Programi i doktoratës synon zhvillimin e kapaciteteve kërkimore, analitike dhe kritike të studentëve, duke i përgatitur ata për rol aktiv në komunitetin shkencor kombëtar dhe ndërkombëtar, përfshirë publikimin në revista shkencore të indeksuara, prezantimin në konferenca shkencore dhe angazhimin në projekte kërkimore ndërdisiplinare.

Rezultatet e të Nxënit

Pas përfundimit të lëndëve obligative, lëndëve zgjedhore dhe realizimit të punimit të doktoratës, doktorantët e programit të studimeve të doktoratës në Stomatologji do të jenë të aftë:

• të kuptojnë dhe të zbatojnë parimet themelore të etikës akademike dhe kërkimore;
• të identifikojnë dhe të qartësojnë problemet kërkimore relevante në fushën e stomatologjisë;
• të identifikojnë pikat kyçe në hulumtimet shkencore dhe t’i analizojnë ato në mënyrë kritike;
• të përdorin në mënyrë të avancuar bibliotekat fizike dhe virtuale, si dhe bazat ndërkombëtare të të dhënave shkencore;
• të interpretojnë dhe të analizojnë të dhënat shkencore duke përdorur metoda adekuate statistikore dhe analitike;
• të zgjedhin dhe të aplikojnë metoda dhe teknika bashkëkohore për realizimin e hulumtimeve shkencore të pavarura dhe të strukturuara;
• të demonstrojnë shkathtësi në shfrytëzimin e literaturës shkencore dhe fakteve të dokumentuara nga artikuj shkencorë;
• të klasifikojnë, krahasojnë dhe sintetizojnë punime shkencore të shumta në bazë të shqyrtimit sistematik të literaturës, sipas fushës së përzgjedhur stomatologjike;
• të transferojnë njohuritë dhe metodat nga teoria në praktikën kërkimore;
• të përgatisin projekt-propozime kërkimore konkurruese;
• të organizojnë dhe të realizojnë prezantime dhe komunikime shkencore gojore në konferenca dhe takime profesionale;
• të planifikojnë dhe të udhëheqin diskutime shkencore në fushat e tyre kërkimore të interesit;
• të gjykojnë dhe të demonstrojnë kompetencë në aplikimin e metodave dhe teknikave të ndryshme kërkimore;
• të zhvillojnë mendimin kritik përmes analizës dhe debatit të studimeve të ndryshme në stomatologji;
• të dizajnojnë, përgatisin dhe prezantojnë punime shkencore për publikim në revista shkencore dhe platforma akademike ndërkombëtare.