Asst. Arbnore Ibrahimaj Gashi ka lindur më 29 korrik 1982 në Istog, Kosovë. Arsimin fillor dhe të mesëm e kreu në vendlindje, ndërsa studimet universitare i përfundoi në Fakultetin e Mjekësisë të Universitetit të Prishtinës, në programin e Fizioterapisë. Ajo u diplomua në vitin 2004 me notë mesatare 9.48, duke u shpallur Studente e Dalluar e Universitetit të Prishtinës. Në vitin 2011 përfundoi studimet pasuniversitare, duke fituar titullin Master në Shkencat e Fizioterapisë.

Formimin e saj akademik e ka thelluar edhe në nivel ndërkombëtar, duke mbrojtur dy doktoratura: PhD në Kineziologji në Universitetin “Ss. Cyril and Methodius” të Shkupit (2018) dhe PhD në Fizioterapi në Alma Mater Europaea, Maribor, Slloveni (2024).

Që nga viti 2005 është angazhuar si pjesë e stafit akademik të Fakultetit të Mjekësisë, në Degën e Fizioterapisë. Në vitin 2017 u zgjodh Asistente e rregullt dhe në vazhdim ligjëruese, duke kontribuar në zhvillimin e programeve studimore dhe edukimin e gjeneratave të reja të fizioterapeutëve. Për më shumë se një dekadë ka punuar gjithashtu si fizioterapeute në praktikën klinike në Qendrën Diagnostike–Terapeutike “Rezonanca”.

Asst. Arbnore Ibrahimaj Gashi është autore dhe bashkëautore e një numri të konsiderueshëm punimesh shkencore të publikuara në revista ndërkombëtare të indeksuara, si dhe ka marrë pjesë me prezantime në kongrese dhe konferenca shkencore brenda dhe jashtë vendit. Ajo ka ndjekur trajnime të shumta kombëtare e ndërkombëtare në fushën e mësimdhënies dhe zhvillimit akademik, përfshirë programet e Universitetit të Prishtinës dhe Erasmus+, duke avancuar në metodologjitë moderne të arsimit të lartë.

Ajo ka ndjekur një gamë të gjerë trajnimesh profesionale, përmes të cilave ka përvetësuar njohuri të avancuara dhe teknika bashkëkohore të fizioterapisë, duke u përqendruar në qasje moderne të rehabilitimit dhe përmirësimit të praktikës klinike.

Në kuadër të angazhimit të saj institucional ka shërbyer si Sekretare e Degës së Fizioterapisë në Fakultetin e Mjekësisë, si dhe ka qenë Nënkryetare e Odës së Fizioterapeutëve të Kosovës. Aktualisht, ushtron detyrën e Koordinatores për Zhvillim Akademik në Fakultetin e Mjekësisë.  Përmes punës së saj akademike, shkencore dhe profesionale, Asst. Arbnore Ibrahimaj Gashi ka dhënë një kontribut të rëndësishëm në avancimin e fizioterapisë në Kosovë dhe në ngritjen e cilësisë së arsimit të lartë në këtë fushë.