Të nderuar anëtarë të Këshillit të ri të Fakultetit të Mjekësisë, të dashur kolegë, profesorë, asistentë, staf administrativ dhe përfaqësues të studentëve,

Me një ndjenjë të thellë përgjegjësie dhe kënaqësie, ju përshëndes në cilësinë e Dekanit të Fakultetit të Mjekësisë, në këtë mbledhje të parë të Këshillit të ri të Fakultetit të Mjekësisë. Kjo mbledhje shënon një moment të rëndësishëm, pasi përkon me fillimin e vitit të ri akademik, i cili nisi më 16 shtator 2024. Kjo datë simbolizon një fazë të re në përpjekjet tona për të forcuar dhe avancuar Fakultetin tonë të nderuar, një institucion me një traditë të gjatë dhe një rol udhëheqës në shkencën dhe përkushtimin ndaj mjekësisë.

Në këtë kontekst, dua të shpreh falënderimet dhe mirënjohjen tonë për të gjithë ata që kanë kontribuar në zhvillimin e Fakultetit tonë gjatë viteve të kaluara. Përkushtimi i stafit akademik, angazhimi i studentëve dhe mbështetja e partnerëve tanë ka krijuar një bazë të fortë, mbi të cilën do të ndërtojmë vizionin tonë për të ardhmen.

Gjithashtu, vlerësojmë dhe falënderojmë të gjitha menaxhmentet e kaluara të Fakultetit të Mjekësisë për arritjet e tyre të rëndësishme. Kontributi i tyre ka qenë i domosdoshëm për konsolidimin e këtij fakulteti. Jemi plotësisht të vetëdijshëm për sfidat që na presin përpara, dhe ky vit akademik sjell detyra të reja dhe përgjegjësi që kërkojnë përkushtim maksimal për të avancuar cilësinë e mësimdhënies dhe kërkimit shkencor.

Si menaxhment i ri, synimi ynë është përmirësimi i vazhdueshëm i standardeve akademike dhe përgatitja e profesionistëve të aftë, të cilët do të kontribuojnë në shërbimin ndaj shoqërisë. Në këtë rrugëtim, së bashku me Këshillin e Fakultetit të Mjekësisë dhe komunitetin akademik, do të punojmë për të çuar përpara Fakultetin tonë, duke ruajtur vlerat tradicionale dhe duke përqafuar inovacionin.
Në fillimin e këtij mandati katërvjeçar, jemi të vetëdijshëm për sfidat dhe përgjegjësitë që na presin. Ndjekja e një strategjie të qartë dhe të kujdesshme është detyra jonë kryesore. Kjo strategji do të përqendrohet në katër fusha kryesore:

•    Përmirësimi i vazhdueshëm i cilësisë së mësimdhënies dhe mësimnxënies;
•    Avancimi i kapaciteteve kërkimore dhe rritja e aftësive të stafit akademik;
•    Zhvillimi dhe përmirësimi i infrastrukturës për mësimdhënie dhe kërkime shkencore;
•    Zgjerimi i bashkëpunimeve ndërkombëtare dhe integrimi i Fakultetit në rrjetet ndërkombëtare universitare dhe shkencore.

Kolegë të nderuar, më lejoni të theksoj rëndësinë e përkushtimit dhe synimeve tona të përbashkëta, që na kanë sjellë deri këtu. Vlerat që kemi ndërtuar së bashku janë themeli mbi të cilin do të ndërtojmë të ardhmen e Fakultetit tonë. Pa përkushtimin dhe angazhimin tuaj, arritjet tona nuk do të ishin të mundura. Së bashku, do të vazhdojmë të ndërtojmë një të ardhme të ndritur për Fakultetin e Mjekësisë, duke përmbushur detyrimet tona ndaj shoqërisë.

Gjatë këtij mandati, do të përballemi me sfida dhe detyra të reja, por përkushtimi ynë do të jetë një mision, jo një privilegj. Në këtë mandat, përkushtimi ynë do të jetë një mision i përbashkët, i karakterizuar nga drejtësia, cilësia, transparenca, bashkëpunimi ekipor dhe respektimi i meritokracisë dhe ligjit. Këto atribute janë çelësi i suksesit tonë të ardhshëm.

Faleminderit dhe suksese të gjithëve për vitin e ri akademik!